İran parlamentinə hücum: ölənlərin sayı 7 nəfərə çatdı
İran parlamentinə silahlı hücum nəticəsində ölənlərin sayı 7 nəfərə çatıb.
Bu barədə Tasnim agentliyi məlumat yayıb. Agentlik, həmçinin 4 nəfərin girov saxlanıldığını bildirir.
Xatırladaq ki, bu gün səhər saatlarında İran parlamentinə və İmam Xomeyni mavzoleyinə silahlı hücumlar olub. Həmçinin təhlükəsizlik orqanları İmam Xomeyni mavzoleyinin qarşısında partlayıcı qurğu aşkarlayaraq zərərsizləşdirib.
İranın daxili işlər naziri parlamentə və mavzoleyə hücumlarla bağlı Tehranda təcili iclas çağırıb.
FARS agentliyinin məlumatına əsasən, hücumların məsuliyyətini İŞİD terror qruplaşması öz üzərinə götürüb.
