Beynəlxalq Dialoq və İnkişaf Alyansı AŞPA-da girovların hüquqlarının müdafiəsinə çağırdı

Tədbirdə müxtəlif ölkədən olan deputatlar, KİV nümayəndələri iştirak ediblər. Beynəlxalq Dialoq və İnkişaf Alyansının sədri, tarix elmləri namizədi Nüşabə Məmmədova çıxış edərək bildirib ki, 5 il bundan əvvəl Kəlbəcər rayon sakinləri Dilqəm Əsgərov və Şahbaz Quliyev öz valideynlərinin qəbirlərini ziyarət etmək istəyərkən erməni silahlı qüvvələri tərəfindən girov götürülüblər. Avropa Şurası İnsan Haqları üzrə Avropa Məhkəməsində bu məsələyə baxılması prosesi uzanır. Nəzərə alınmalıdır ki, onların səhətində ciddi problemlər var və bu məsələnin həlli sürətləndirilməlidir.

Dilqəm Əsgərovun oğlu Kürdoğlu Əsgərov, 2 ilə yaxın müddətdə atasına dair heç bir video və ya foto görüntüsünün olmadığı birdirdi və Avropa Şurası Parlament Assambleyası üzvlərindən atasının azad olunması, geri qaytarılması ilə bağlı müvafiq addımlar atmağa çağırıb.

AŞPA-da Azərbaycan nümayəndə heyətinin sədri Səməd Seyidov, nümayəndə heyətinin üzvü Ülviyyə Ağayeva, Azərbaycan Respublikası Qaçqınlar və Məcburi Köçkünlər üzrə Dövlət Komitəsinin sədr müavini Fuad Hüseynov, Azərbaycanın Avropa İnsan Haqları Məhkəməsi yanında səlahiyyətli nümayəndəsi Çingiz Əsgərov əsir və girovların beynəlxalq humanitar hüquq normalarına uyğun olaraq dərhal və qeyd şərtsiz qaytarılması ilə bağlı məruzə etdilər.

Tədbirin sonunda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Beynəlxalq Dialoq və Inkişaf Alyansı tərəfindən hazırlanan “Əsir və Girov götürülmüş Azərbaycan vətəndaşlarının beynəlxalq müdafiəsi” adlı film nümayiş olunub.