Sofiya konfransı: Tərəfdaşlıq dinlərarası dialoqun bariz nümunəsidir

Azərbaycanla Bolqarıstan arasında diplomatik münasibətlərin qurulmasının 25 illiyi ilə bağlı 2017-ci ilin əvvəlindən keçirilən silsilə tədbirlər çərçivəsində Sofiyada konfrans təşkil edilib.

“Bolqarıstan-Azərbaycan: diplomatik əlaqələrin 25 ili. İkitərəfli tərəfdaşlıq və çoxtərəfli əməkdaşlığın perspektivləri” mövzusunda tədbir Azərbaycanın Bolqarıstandakı səfirliyinin təşəbbüsü ilə keçirilib.

Bolqarıstanın Xarici İşlər Nazirliyi nəzdindəki Diplomatik İnstitutun və bu ölkənin nüfuzlu qeyri-hökumət təşkilatlarından olan Atlantik Klubun birgə təşkil etdiyi konfransda Azərbaycan və Bolqarıstan arasında ikitərəfli münasibətlərin, ölkəmizin Avropa İttifaqı ilə əlaqələri çərçivəsində Bolqarıstanla əməkdaşlığın hazırkı durumu və inkişaf perspektivlərinə dair fikir mübadiləsi aparılıb.

Tədbirdə Bolqarıstanın dövlət qurumlarının və qeyri-hökumət təşkilatlarının, işgüzar dairələrin, təhsil və elm ocaqlarının, yerli mətbu orqanların, həmçinin ölkədə akkreditə olunmuş diplomatik korpusun və beynəlxalq təşkilatların nümayəndələri iştirak etdilər.

Konfransın açılışında Bolqarıstanın Xarici İşlər Nazirliyi nəzdindəki Diplomatik İnstitutunun direktoru Tanya Mixaylova, Atlantik Klubunun prezidenti, keçmiş xarici işlər naziri Solomon Passi və fəxri qonaq qismində Bolqarıstanın energetika naziri Temenujka Petkova çıxış ediblər.

Tədbiri açan Tanya Mixaylova Bolqarıstanın Azərbaycanın müstəqilliyini tanıyan ilk ölkələrdən biri olduğunu qeyd edərək ölkələrimiz arasında münasibətlərin tarixinin vacib məqamlarına diqqət çəkib, bu xüsusda rəhbərlik etdiyi Diplomatik İnstitutun Azərbaycan ilə 10 ilə yaxın müddətdə tərəfdaşlıq etdiyini bildirib.

Solomon Passi ölkəmizə səfəri və Prezident İlham Əliyev ilə görüşü barədə məlumat verib. O, hər iki ölkənin Avropa ilə Asiyanın kəsişməsində strateji mövqeyə malik olduğunu vurğulayaraq Azərbaycan və Bolqarıstan arasında əməkdaşlığın daha da inkişaf etdirilməsi üçün böyük potensialın mövcud olduğunu diqqətə çatdırıb.

Azərbaycanın Bolqarıstandakı səfiri Nərgiz Qurbanova Azərbaycan ilə Bolqarıstan arasında mədəni, iqtisadi və digər sahələrdə əlaqələrin, həmçinin insanlararası bağlantıların 1992-ci il iyunun 5-də diplomatik münasibətlərin qurulmasından əvvəl də olduğunu söyləyib. O, son 25 ildə hər iki ölkənin uğurlu sosial-iqtisadi inkişaf prosesi keçdiyini, Bolqarıstanın Avratlantik qurumlara qoşulduğunu, Azərbaycanın ümummilli lider Heydər Əliyevin uzaqgörən siyasəti nəticəsində böyük nailiyyətlər əldə etdiyini və bu siyasətin hazırda Prezident İlham Əliyev tərəfindən davam etdirildiyini vurğulayıb. Müstəqilliyimizin ilk günlərindən Bolqarıstanla dostluq əlaqələrinin və müxtəlif sahələrdə qarşılıqlı faydalı əməkdaşlığın gücləndirilməsinin ölkəmizin xarici siyasətinin prioritetlərindən biri olduğunu qeyd edən səfir ölkələrimiz arasında strateji tərəfdaşlıq münasibətlərinin multikulturalizmin və dinlərarası dialoqun bariz nümunəsi olduğunu diqqətə çatdırıb.

Konfransın fəxri qonağı qismində çıxış edən Bolqarıstanın energetika naziri Temenujka Petkova son 25 il ərzində Bolqarıstan-Azərbaycan münasibətlərinin yüksələn xətlə inkişaf edərək strateji tərəfdaşlıq səviyyəsinə çatdığını bildirib O, Bolqarıstanın Azərbaycanın ərazi bütövlüyünü, suverenliyini və beynəlxalq səviyyədə tanınmış sərhədlərinin toxunulmazlığını dəstəklədiyini vurğulayıb. Energetika sahəsinin iki ölkə arasında iqtisadi əlaqələrin mühüm hissəsi olduğunu və Avropanın enerji təchizatının təhlükəsizliyi və diversifikasiyası nöqteyi-nəzərindən Azərbaycanın əhəmiyyətli tərəfdaş olduğunu qeyd edən nazir ölkəsinin Cənub Qaz Dəhlizində iştirak etdiyini, bu layihənin tərkib hissələri olan Bolqarıstan-Yunanıstan və Bolqarıstan-Türkiyə qaz bağlantılarının tikintisi ilə bağlı zəruri tədbirlər həyata keçirdiyini deyib.

Azərbaycan və Bolqarıstan arasında ikitərəfli əlaqələrə həsr olunmuş birinci paneldə Bolqarıstanın Xarici İşlər Nazirliyinin ikitərəfli əlaqələr üzrə baş direktoru Kostadin Kocabaşev əsas məruzəçi qismində çıxış edib. Ölkələrimiz arasında ikitərəfli münasibətlərin möhkəm təmələ əsaslandığını bildirən baş direktor bu xüsusda 1995-ci ildə imzalanmış dostluq və əməkdaşlıq haqqında Sazişi və 2015-ci ildə imzalanmış strateji tərəfdaşlıq haqqında Birgə Bəyannaməni qeyd edib. O, iki ölkə arasında siyasi dialoqun yüksək səviyyədə olduğunu, energetika və nəqliyyat sahələrində əlaqələrin inkişaf etdirilməsi üçün böyük perspektivlərin olduğunu diqqətə çatdırıb. Azərbaycan və Avropa İttifaqı arasında yeni saziş üzrə müzakirələrin başlanmasını yüksək qiymətləndirən K.Kocabaşev bu sənədin tərəflər arasında əməkdaşlığın gücləndirilməsinə töhfə verəcəyinə inandığını bildirib. O, həmçinin Azərbaycan və Bolqarıstan arasında çoxtərəfli formatda, xüsusilə NATO və Qara dəniz hövzəsi çərçivəsində əməkdaşlığın vacibliyini qeyd edib.

Bu paneldə, həmçinin Azərbaycan Milli Məclisinin deputatı, Azərbaycan-Bolqarıstan parlamentlərarası əlaqələr üzrə işçi qrupunun rəhbəri Rauf Əliyev, Bolqarıstan Xarici İşlər Nazirliyinin Şərqi Avropa və Mərkəzi Asiya Departamentinin direktoru Qanço Qanev və İqtisadiyyat Nazirliyinin Rusiya Federasiyası, MDB ölkələri və Gürcüstan şöbəsinin müdiri İliyan Kostov çıxış edib, iştirakçıların suallarını cavablandırıblar.

Azərbaycan və Bolqarıstan arasında əlaqələrin yüksək səviyyədə olduğunu söyləyən Rauf Əliyev iki ölkənin parlamentləri arasında həm ikitərəfli əsasda, həm də beynəlxalq təşkilatlar çərçivəsində sıx əməkdaşlıq etdiklərini vurğulayıb və bu barədə tədbir iştirakçılarına ətraflı məlumat verib.

İki ölkənin liderləri arasında daim səmimi münasibətlərin olduğunu qeyd edən Qanço Qanev Azərbaycan və Bolqarıstan arasında 70-dən çox sənədin, o cümlədən 2015-ci ilin may ayında Azərbaycanın Prezidenti İlham Əliyevin Sofiyaya səfəri zamanı strateji tərəfdaşlıq haqqında Birgə Bəyannamənin imzalandığını, həmçinin Veliko Tirnovo şəhərindəki “Trapezitsa” muzey-qoruğunun bərpası layihəsinin Heydər Əliyev Fondunun dəstəyi ilə uğurla həyata keçirildiyini söyləyib.

İliyan Kostov Bolqarıstanın Azərbaycanla iqtisadi əlaqələrin inkişafına böyük önəm verdiyini vurğulayaraq bu sahədə həyata keçirilən tədbirlər haqqında danışıb. O, Azərbaycanla Bolqarıstan arasında ticarət-iqtisadi və elmi-texniki əməkdaşlıq üzrə Müştərək Komissiyanın 2016-cı il sentyabrın 29-da Bakıda keçirilmiş 4-cü iclası barədə də məlumat verib. Azərbaycan ilə Avropa İttifaqı arasında əməkdaşlığa həsr olunan ikinci paneldə Azərbaycanın xarici işlər nazirinin müavini Mahmud Məmmədquliyev əsas məruzəçi qismində çıxış edib. Azərbaycan ilə Avropa İttifaqı arasında münasibətlərin tarixi haqqında məlumat verən və ölkəmizin Avropanın enerji sahəsində strateji tərəfdaşı olduğunu vurğulayan nazir müavini Azərbaycanın Avropa İttifaqı ilə bərabərhüquqlu və qarşılıqlı faydalı əməkdaşlığın inkişaf etdirilməsində maraqlı olduğunu bildirib. Bu xüsusda 2015-ci ilin may ayında Riqada keçirilmiş Şərq Tərəfdaşlığının 4-cü Zirvə görüşü çərçivəsində ölkəmiz tərəfindən Avropa İttifaqına strateji tərəfdaşlıq haqqında saziş layihəsinin təqdim edildiyini xatırladan nazir müavini sözügedən sənəd üzrə rəsmi danışıqların başlandığını diqqətə çatdırıb və Bolqarıstanın bu prosesə fəal dəstək verəcəyinə ümid ifadə edib. O, Azərbaycan ilə Avropa İttifaqı arasında əməkdaşlığın inkişaf etdirilməsi baxımından nəqliyyatın perspektiv sahə olduğunu deyib və Avropa ilə Asiya arasında yük daşımaları kontekstində beynəlxalq nəqliyyat və tranzit dəhlizlərinin inkişafı üçün strateji coğrafi yerləşməyə və müvafiq infrastruktura malik olan Azərbaycanın və Bolqarıstanın əməkdaşlığının əhəmiyyətini vurğulayıb.

İkinci paneldə, həmçinin SOCAR Balkan şirkətinin icraçı direktoru Murad Heydərov, Bolqarıstan Enerji Holdinqinin icraçı direktoru Petyo İvanov və Bolqarıstanın Nəqliyyat, İnformasiya Texnologiyaları və Rabitə Nazirliyinin Beynəlxalq Əməkdaşlıq Departamentinin direktoru Nadejda Buxova çıxış ediblər.

Azərbaycanın və Bolqarıstanın enerji sahəsində əməkdaşlığının inkişaf etdirilməsi üçün geniş perspektivlərin olduğunu qeyd edən Murad Heydərov ölkəmizin bu sahədə Bolqarıstanla əlaqələrə böyük önəm verdiyini bildirib, Cənub Qaz Dəhlizinin həyata keçirilməsi sahəsində görülən işlər haqqında məlumat verib.

Petyo İvanov rəhbərlik etdiyi Bolqarıstan Enerji Holdinqi haqqında danışıb, bu şirkətin SOCAR ilə əməkdaşlığından, həmçinin Azərbaycan qazını nəql edəcək Bolqarıstan və Yunanıstan arasında qaz bağlantısı layihəsinin həyata keçirilməsindən söhbət açıb.

Nadejda Buxova Bolqarıstanın nəqliyyat infrastrukturunun inkişaf etdirilməsi məqsədilə görülən işlər haqqında məlumat verib. O, ikitərəfli iqtisadi əlaqələrin gücləndirilməsi baxımından bu sahədə böyük potensialın olduğunu və bu baxımdan Azərbaycan tərəfi ilə beynəlxalq nəqliyyat və tranzit dəhlizləri çərçivəsində əməkdaşlıq etməkdə maraqlı olduqlarını diqqətə çatdırıb.

About Author